【新增GD內容及圖片】
韓國天團BIGBANG嘅30歲成員太陽今年2月娶拍拖多年嘅32歲演員女友閔孝琳，成為BIGBANG首名人夫。

而太陽婚後一個月就以現役兵身份入伍，雖然要同老婆分開，但太陽一有休假就會爭取時間見老婆，享受二人世界。

除咗掛住老婆外，太陽亦都冇唔記得支持佢嘅粉絲，佢噚日喺Instagram上載喺入伍期間收到粉絲嘅信，仲窩心留言話每一封都會讀，而且喺佢困難嘅時候，讀粉絲嘅信就令佢有好大嘅力量，同時答謝粉絲，冧爆話：「愛你們，想你們。」

另外，太陽隊友、現時同樣喺陸軍服緊兵役嘅G-DRAGON（GD），佢入伍不久有新相流出，可見佢手同腳都曾受傷，而上月有報道指GD進行右腳腳踝手術，其所屬YG事務所就話GD完成手術後，會盡快歸隊服役。而今日網上就有GD嘅新相流出，當中雖然唔見GD樣，但可見其右腳有一個嘢保護住右腳，唔知係唔係做完手術後要保護住右腳，見GD穿上軍服，估計佢手術後已經回歸軍隊服役。

更多韓流，喺晒《娛果》
http://fb.com/appledailyent