民建聯今日公布南區參選名單，今屆唔會再喺中西區觀龍爭取連任嘅黨團召集人葉國謙，現身為民記一眾「戰將」打氣後，梗係被問到，點解唔選呀？係咪政改領軍不力，甩轆收場被建制陣營「票債票償」呀？

阿謙當然話啦，唔選同政改「甩轆」以及泛民上屆立法會委員會成功搶位一事無關，話交棒係好早嘅部署啦，一早部署接班人。但唔少傳媒都話，唔知接佢班嘅係乜水喎？嗱，接佢班嘅真係「阿水」嚟㗎。

葉國謙話喎，佢嘅接班人叫楊開永，由於「永」字同「水」好似，所以花名叫做「阿水」，話觀龍好多街坊都識「阿水」係邊個，加上「阿水」已經喺觀龍工作四年，有信心即使自己唔選，派「阿水」去選，都贏到空降該區嘅青年新政傘兵喎。