好喇，到《RM》亞博館開粉絲見面會第二part，七位成員換咗唔同顏色嘅Poloshirt同牛仔褲現身，開始同粉絲於台上玩遊戲。第一個遊戲係《RM》第一組成員同粉絲著同一條褲、一齊跑過去對面，第二組就係成員同粉絲臉貼臉夾住個罐跑過去對面，第三組就係粉絲手托一盤乒乓球同成員一齊跳繩到對面、最後就係金鐘國揹住一個男粉絲過對面，之後食掛喺對面嘅冬甩。

其中一個女粉絲上台時，表示自己同劉在錫撞臉，HaHa都話個粉絲係「香港劉在錫」，女粉絲就同劉在錫合照，劉在錫更舉V，非常可愛，之後劉在錫就笑言個女粉絲係佢個妹。

Gary就同宋智孝一組，二人因為同粉絲著同一條褲，台下當然就要大叫起哄。而當金鐘國揹住一個女粉絲玩遊戲時，全場亦大叫起哄。玩完遊戲時，劉在錫就同每一個粉絲握手，而勝出嘅粉絲就有波鞋收，劉在錫於台上時就企喺「香港劉在錫」身邊，非常鬼馬。

影合照時，成員因為驚粉絲唔夠分啲相，就叫大會影多一張，而雖然大會之前話唔俾自拍，不過當粉絲於台上拎出手機時，劉在錫亦照樣肯同合照。