有人說爸爸特別疼錫女兒，因為女兒嬌聲嗲氣又夠孝順，正如2001年港姐冠軍楊思琦對住一個軍人爸爸，也會令爸爸溫柔起來。平日思琦因工作繁忙很少時間陪家人，故父母有時會到她出席活動的地方見女兒一面，原來爸爸見女兒工作太忙，曾要求她不要做下去，無奈女大女世界，為人父親只能在背後默默支持。

思琦為方便工作早已搬離父母家，只偶然返舊居探父母，父親節前父女兩人相約返石硤尾舊居附近的泰國餐館撐枱腳，勁擦一餐，思琦還趁機與父親緬懷童年事。她說：「記得以前細個，爸爸最鍾意帶我去軍營玩，又教我游水、燒槍同一切水上活動，喺爸爸身上學到好多嘢，佢管教得我同哥哥好嚴，要尊師重道，要有禮貌儀態，佢唔使出聲，一個凌厲眼神我哋就要識做。」
過去在爸爸的影響下，思琦曾考慮當警察，不過她有大近視，而且體能不合格。沒想到因爸爸為她拿的港姐報名表格，令她踏入人生另一階段。她說：「填表格之後我都冇理過，但喺最後一日交表格，嗰日大風大雨，爸爸冒雨滴到一身濕幫我去交表格，結果呢次我冇令佢失望。」
現年29歲的思琦以清純及慳家見稱，01年在父親鼓勵下參選港姐，當時她與父母同住石硤尾大坑西新邨，因而被稱為「屋邨港姐」，其後她順利摘下后冠，更獲無綫力捧，星途暢順，翌年拍攝劇集《血薦軒轅》與李泳豪傳戀情，雖現已搬離屋邨與男友於西貢同居，但與父親關係依然緊密。

思琦是個樂天派，每遇有不開心的事，她很快便忘記，思琦說：「屋企係我嘅避難所，爸爸就係我嘅庇護站，無論開心或者唔開心嘅事，我都會同爸爸傾訴。」楊爸爸則看着女兒說：「佢入行咁耐都冇改變到，只係成熟咗啲，我同佢乜嘢都講，有時會開解佢，只有睇開啲，社會上乜嘢人都有，佢啲朋友我通通見過，佢係一個孝順乖女。」與爸爸肩並肩歡度父親節的思琦，笑言祝爸爸身體健康，願天下父親同樣快樂。
採訪：陳寶明　攝影：葉君海