信和牽頭發展嘅大角嘴柏景灣，上月底獲德國柏林舉辦嘅，第五十四屆房地產業聯合會頒發優良建築獎。據講負責評審呢個獎嘅評判，包括全球頂尖嘅建築同地產界專業人士，由物業外形、質素、美感、功能，同埋對附近環境帶嚟正面影響等作為評分標準。
柏景灣由五座住宅大廈組成，有三個面積共三十萬方呎嘅主題花園，會所超過十五萬方呎，並有一個八十萬方呎商場。個主題花園重係出自名園林設計師BeltCollins手筆。
好橋唔怕抄，難怪有二千一百個單位嘅將軍澳坑口站蔚藍灣畔，規模、設計藍本都沿用柏景灣嘅設計啦!第日開賣時又多個賣點嘞，個盤已經申請售樓紙，今年就可以推出。

遮打大廈租出75%
新落成嘅中環遮打大廈，業主同管理公司置地公司，總承建商金門建築，同升降機供應商迅達升降機（香港）有限公司，攞到怡和集團嘅「PrideinPerformance」獎。雖然呢個係集團畀嘅獎，但各公司都落實「合作約章」，發揮合作精神，先至令到呢項總投資十九億嘅物業，可以提前完工。𠵱家遮打大廈商場部份已全部租出，寫字樓租出率都超過七成半。