尹天照曾經係「亞視一哥」，《我和殭屍有個約會》令佢事業攀上高峰。但年前，尹天照嘅太太證實患上血癌，為咗照顧太太，佢選擇淡出幕前。

尹天照日前接奇妙電視節目《是敢的》訪問時話﹕「以前我為工作去做好自己，但經歷咗一段日子，我同太太都好辛苦，如果我唔信主我捱唔住。人生無嘢係巴閉，最重要係家人。」

入行35年，有得亦有失。尹天照回憶當年讀亞視藝訓班嘅「爛玩史」，都忍唔住笑話﹕「我、駱達華同吳廷燁三個人係班入面最爛玩，會掉凳、追打，有次玩到追入廁所，我拍門叫佢哋出嚟，點知拍錯門拍咗校長度門，差啲畀人趕出校。」幸好當年校長手下留情，令佢決心改過，認真學習。

尹天照自認係貴人命，多年來得到多位貴人相助，其中一位是電視劇監製梁天，畀機會佢藝訓班未畢業就有機會做主角。不過，當年電視台競爭激烈，尹天照都遇過不公平對待，佢話：「一有TVB人入，我哋就變茄哩啡，我覺得好嬲好唔公平，但因為咁變咗一團火，令自己演得更好！」

精選娛聞，喺晒《娛果》 http://fb.com/appledailyent