入咗行19年嘅實力派歌手張崇基前晚喺微博公佈老婆有喜，真係恭喜晒！唔知係咪呢期興玩裸體藝術，張崇基同老婆學足黃貫中同朱茵呢一對，喺微博放咗張半裸上身嘅合照，不過尺度就冇咁大膽，崇基老婆着咗件tubetop打底，個肚好似籮咁大，估計小龍B應該就快出世。

崇德授湊仔心得

42歲嘅張崇基一向好少講感情事，估唔到一嚟就咁爆公佈自己屋企有新成員，聽講佢老婆係圈外人，名叫Mable，崇基喺微博留言：「Cheung'sfamilynewmembercomingsoon（張家將有新成員）！」之後佢接受電話訪問，仲自爆已經結咗婚十年，佢話：「太太係圈外人比較低調，因為我性格較外向，一直以嚟未ready好，家身邊好多朋友都生小朋友，都係緣份。」佢話老婆下個月會開刀生B，仲話係仔嚟㖭，好多圈中人都留言祝賀，包括教友鄭秀文、江美儀、吳家樂、蔡一智、黃日華、歐陽妙芝等。
至於細佬張崇德早已爬哥哥頭，家有一仔一女，佢話有傳授湊仔秘方畀哥哥。問崇基平時有冇幫手湊侄仔侄女？崇德話：「玩囉，我哋住得遠嘛！」