當年今日
關於我們

隔牆有耳:聲稱曾遊釣島 林公公做「漢奸」 - 李八方

蘋果日報 2011/12/09 00:00


林瑞麟自從「榮升」政務司司長之後,自然要代表特區政府出席大小宴會活動,佢要上台致辭發言就更加唔使講,原本八方以為林公公身為特區政府首席「人肉錄音機」,呢類例牌工作完全係「實食冇黐牙」,點知林公公大前日去日本駐港領事館幫明仁天皇預祝生日酒會,致辭時竟然鬧出疑似「漢奸」風波。
話說當日林公公做主禮嘉賓,佢用英文致辭代表政府祝賀天皇,當日知名嘅日本文化研究學者、網誌「哈日部屋」博主吳偉明都有去慶祝晚會,佢全程聽住林司長致辭,仲讚佢比去年做嘉賓嘅財爺曾俊華較生動。
林公公係演辭入面話,自己一直好鍾意去日本旅行,日本四大島即係本州、北海道、九州同埋四國都去過晒。佢又提到80年代同太太加埋幾歲嘅女去東京及日光,被日光好似瑞士咁嘅景氣吸引;又吹水話最近同已經亭亭玉立嘅女去北海道,用一日時間學識埋downhillskiing。
點知呢個時候林公公話鋒一轉,話自己最難忘係去左Senkaku(尖閣諸島,即係釣魚台),仲重複咗幾次,此語一出台上台下都心中譁然,大家即時心諗何解林瑞麟突然做「漢奸」?用咗只得日本人先用嘅尖閣諸島英文名,唔用番中國人用嘅釣魚台英文名DiaoyuIslands、或者更加國際化嘅PinnacleIslands?事關陳方安生仲做緊政務司司長嘅年代,曾經一次用錯Senkaku呢個名,即刻畀班土共上綱上線話佢係漢奸!
正當大家個心仲十五十六之際,忽然聽到林公公說話從Senkaku經大橋去本州,大家先知佢原來將四國嘅英文Shikoku,讀錯咗做尖閣諸島嘅Senkaku!呢件瘀事俾人放上網傳閱後,好多網民都恥笑佢係咪要曲線保釣,不過可能在場嘅日本人可能一度如墮五里迷霧,「到底林瑞麟點解咁易衝破海上保安隊防線走上釣魚台呢?」

mailto:[email protected]