【有料到】22分馬虎頭蛇尾 強配雷神輕磅偷襲(韋倫)
有料到韋倫首驫
潘頓剛戰開始停賽,莫雷拉立即發威贏三場,後者今季重臨做蔡廐主帥有辣有唔辣,好彩嘅係蔡廐四班以上多實力馬,反而餘下嘅五班空缺,雷神揀馬時自然要零舍小心。
周日(23日)頭場五班1000米,雷神就揀咗為呂廐「首驫」效力,有速度之馬跑直路賽可盡展所長,係時候贏馬出頭。
「首驫」現時評22分,係全港其中一匹最低分之馬,此駒前速相當唔錯,但奈何在末段無加速力,虎頭蛇尾,常常有頭威無尾陣,不過這樣並非代表牠一無是處。
「首驫」今季喺五班漸見起色,前仗跑谷草1000米,大外檔起步後繼續發揮速度,可惜被「海之濤」貼欄佔得先機,結果「首驫」拍住放頭馬仍唔斷跑得第三,走勢明顯比以往改善。上場此駒跑1200米稍長,最終跟隨前領馬後以第五名完成賽事,表現亦算唔錯。
「首驫」今戰跑1000米直路賽,有莫雷拉幫助下,早段如無意外可穩佔前列,同場快馬唔算特別多,負輕磅走順後對手好難追趕,埋門準備工夫完整,狀態對辦,出頭可期。