當年今日

大導演+大明星 - 谷德昭

蘋果日報 2002/07/10 00:00


十歲的外甥有天問道:「史匹堡係咪世界上最出名嘅導演呀?」七歲的外甥女有天望着《VanillaSky》的海報問道:「呢個靚仔係咪湯告魯斯呀?」遠在香港的兩個小朋友都識得史匹堡與湯告魯斯,你話佢兩個係咪夠晒出名?
史與湯二人話合作話合作咗好多年,終於在《未來報告》中實現。為了隆重其事欣賞大明星加大導演,早兩日已經在觀眾群最優秀、銀幕比例最好嘅UA金鐘戲院訂飛,然後約埋幾個戲迷老友焚香一拜請、焚香二拜請地誠心睇戲。
未來世界,有喪子之痛的湯飾演一名防止殺人兇案發生的警察,嚴格來說,是由預言者預言未來將有兇案發生,湯就要趕在兇案發生前逮捕行兇者。遊戲規則介紹清楚後,湯旋即被捲入未來殺人疑雲,於是湯展開逃亡……
故事形式有點像未來版《Fugitive》,人物描寫與關係有點像《FifthElement》,大橋則有點像《LastActionHero》。大導演與大明星並沒有展開角力賽,相反地目標似乎頗一致,並不是製造一齣動作娛樂片,而是拍攝一齣探討道德價值觀的電影。
全片沒有嶄新的特視交果,亦沒有震人心弦的動作場面。湯長期瘀口瘀面,比起以往的玉面郎君形象有分別,尤其是個鼻隆得高過喜馬拉雅山。
同年輕一輩觀眾傾開,原來他們心目中的史匹堡並不是娛樂片導演,近作包括:《A.I.》與《SavingPrivateRyan》都不是純娛樂片,比較我所認識的史匹堡很不相同,因為想起史匹堡,我便會想起《Jaws》、《ET》及《RaidersoftheLostArk》。
入場前需知:如果誤當《未來報告》是娛樂片霸的話,觀看時恐防會覺得太多口水,但如果準備睇劇情片兼開動腦筋諗情節的話,《未來報告》就係你杯茶。敬請對號入座。