今日開學嘞！深受名人追捧嘅銅鑼灣維多利亞幼稚園，今朝就有唔少名人明星送仔女返學，吳忻熹晨早8點多湊住囡囡Scarlet返學，見佢素顏現身，一見記者即匆匆拉住個女入學校；應昌佑喺10點40分湊大仔應嘉軒返學，囝囝揸住排益力多開心上學，應昌佑嘅囝囝好高大，佢話囝囝升讀K2，因為今日第一日返學，所以比原定8點45分嘅時間晏少少返學。

到10點45分，諸葛紫岐（Marie）同工人姐姐一齊送送囝囝薛華韜（韜韜）返學，見佢坐住7人車抵達校園，車停在門前落車，先係姐姐落車，之後見囝囝好精靈跳住落車，而着住短褲、粉紅色衛衣戴黑超嘅Marie就殿後，Marie同在場記者say hello後就拖住囝囝入內，但見韜韜冇着校服，同媽咪一齊着住粉紅色polo恤，活潑又靚仔，好得人鍾意。逗留半小時後，Marie就帶住囝囝離開，問佢囝囝點解唔着校服？Marie話：「佢升K2嘞，今日play day以為唔使着校服。」之後佢就話趕時間匆匆離去，但發現Marie上落嘅位置，其座駕都違例停泊。

精選娛聞，喺晒《娛果》
http://fb.com/appledailyent