諸葛紫岐(Marie)同老公薛嘉麟、應屆港姐雷莊𠒇、何依婷、黃瑋琦同張寶欣(Boanne)、賭王何鴻燊四太梁安琪、大仔猷亨、保良局主席陳細潔、玩具大王蔡志明夫婦、太子鐘表老闆鄧鉅明，噚晚喺灣仔出席保良局慈善ball，Marie拐拐吓現身，原來佢右腳腳面患骨膜炎，依家要食藥做物理治療，佢話：「因為之前着咗對好鬆嘅波鞋，行咗一日隻腳好痛，3日之後睇骨醫就發現係骨膜炎。」行路都要人扶，但依然要着住對7吋高踭鞋，Marie自認為咗靚，仲話影完相就即刻換鞋。

提到復活節，Marie話一家三口會去日本旅行，佢話：「去一星期，去迪士尼同動物園，希望隻腳快啲好返，到時老公負責照顧我哋。」問到想唔想生返個made in Japan嘅baby？Marie就笑話：「喺邊度唔緊要，最想快啲有好消息，最好一次過龍鳳胎。」使唔使安排老公食虎鞭補吓？Marie話：「唔使啦，咁恐怖，呢啲都係上天畀嘅。」

另外，港姐們都着上性感低胸晚裝亮相，最有睇頭嘅都算係雷莊𠒇，而Boanne條裙就好似就跌就跌想瀡落嚟咁好危險，所以成日要用手扶住條裙，Boanne話：「因為條裙有水晶同珠，好重，都會注意吓，或者會用披肩唔好走光。」而雷莊𠒇貫徹信心爆棚嘅個性，話啲裙係自己揀，仲大家都carry得好好，問佢係咪好有自信可以撐得起件衫？雷莊𠒇話：「可以咁講啦，我好鍾呢件衫，可以騷自己身材，又閃閃吓好高貴，好襯呢個慈善ball。」此時，企喺身旁嘅Boanne不禁瞄一瞄雷莊𠒇，略帶不屑嘅表情，相信呢啲就係真情流露！

何太前日生日，佢就話4個仔女都有送驚喜，就係送上一個好靚嘅水晶醒酒器連杯，何太大讚好靚，仲話自己有返咁上下年紀，可以坐低嘆吓，其他事就交畀啲仔女去做，佢仲讚猷亨好努力服務保良局，好開心，而其他嘅家族生意都慢慢交畀猷亨去做，所以呀仔都比較忙，咁擔唔擔心個仔冇時間拍拖？何太就話：「唔使擔心，要拍嘅後生仔實搵到。」

大女何超盈係工作狂又叻女，會唔會更令佢擔心？何太話：「佢保利又有新嘅project， 要搵嘅好易，要靠自己努力，佢哋有自己嘅思想。」而何生如常送「肉嘴」賀生日，至於提到趙世曾籌拍自傳電影，何太就話自己冇諗過。

精選娛聞，喺晒《娛果》
http://fb.com/appledailyent