【李八方online】怕咗林鄭和解之手!公民黨黨慶唔請特首
公民黨林鄭李八方
林鄭出席民主黨黨慶兼捐錢,惹嚟買票風波,民主黨亦受壓。蘋果日報
特首林鄭月娥早前喺民主黨黨慶晚宴舉手捐3萬蚊俾李華明唱歌引起爭議,緊隨其後舉行黨慶嘅公民黨,唔知係咪怕咗娥特「太熱情」?決定唔請所有政府官員,黨魁AY楊岳橋話喎,想將晚宴集中喺公民社會同路人。
梁振英任特首年代,問責高官收晒柯打要杯葛民主派黨慶同籌款晚宴,到娥特上場雙方關係先有改善,林鄭日前唔止拉大隊出席民主黨籌款晚宴,仲罕有捐款支持兼IG#大和解,點知惹嚟爭議,有人覺得民主黨唔應該收「政敵」捐款,據知民主黨今晚中委會將就黨慶籌款做檢討,唔知黨員普遍有乜意見?
見到林鄭捐款引起風波,下月底舉行黨慶籌款晚宴嘅公民黨梗係醒水,決定唔請林鄭同一眾官員出席。AY解釋,想將晚宴集中喺公民社會同路人,所以一個官員都無請。至於到時有咩表演項目?佢就賣個關子,話暫時唔透露,八方聽聞上年跳探戈跳到胸骨都裂嘅陳淑莊,今年就唔會表演嘞,籌款重任都係交畀黨內小鮮肉負責。