利物浦禮拜六喺聯賽早場作客曼城，爭取延續近兩場贏波兼唔失波嘅走勢，已經歸隊嘅中場靈魂人物菲臘比古天奴今場肯定無份踢。對於呢位巴西國腳今個夏天希望轉投巴塞隆拿、但係最終唔成事，紅軍領隊高路普話所有隊友都好明白古仔嘅情況。

喺紅軍作客曼城前夕，高路普好有信心咁講，話相信唔會有球員因為古天奴畀巴塞吸引，搞到想離隊而鬧出一場風波有意見。呢位德國籍主帥話：「會唔會有人唔妥古天奴？其實佢哋大部分球員都係好多年朋友，根本唔會有咩芥蒂。大家都傾過呢件事，根本唔係古天奴不滿利物浦，亦都唔係話古仔唔妥紅軍球迷等。我哋講緊嘅係巴塞，唔會有人話『你痴線㗎咩？你想去巴塞做咩呀？』，大家都明白『OK，佢都係想過檔巴塞啫！』，我哋講緊嘅唔係話古天奴想去踢愛華頓吖嘛！如果係咁嘅話，我就會話情況完全唔同嘞！」