交投疏落嘅新能源車開發公司正道集團（1188）今日收報0.021元，全日成交金額17.27萬元，市值得4.27億，反映公司無乜投資者關注，不過佢地今日收市後有份公告就都幾值得大家留意。

佢地公司執行董事許永生話因為計劃移民而辭任，同時唔再做公司副主席，淨係掛返個名做公司顧問，以繼續喺正道集團有需要時作出貢獻。

睇返年報，呢位許永生家陣51歲，持有雙碩士，自從1996年起已經係香港特許秘書公會會員，之後仲做埋香港會計師公會會員，響會計、財務及企業管理方面有超過20年經驗，舊年總酬金成251.8萬元，除返開每個月差唔多袋21萬。

不過早幾年停過牌嘅正道集團，曾經被「投資學人」納入「壞孩子」清單，到早幾日公佈嘅上半年業績蝕緊7,000幾萬，而公司前行政總裁兼執行董事徐建國就8月1號率先以「決定投放更多時間處理個人事務」理由辭職，所以許永生暫時係今年內第二個辭職嘅董事。

雖則公告叫大家唔好諗咁多，但呢位高學歷、高人工、高職位嘅三高人士響呢個時間以移民為理由劈炮，真係好難唔令人想入非非囉。