至於金句令人笑爆嘴,玲姐表示︰「呢啲係『順口溜』,我用唐詩嗰啲押韻,隨口講咗出嚟。以前細個俾阿媽鬧,我會話『側側膊唔多覺,阿媽鬧唔好駁,睇大戲落北角』。」玲姐自爆某次出席友人母親壽宴湊熱鬧唱K,點唱許冠傑的《尖沙咀Susie》,友人一臉尷尬,原來玲姐把歌曲二次創作成《我的媽咪》送壽星婆,她唱:「有佢咁有型呀,冇佢咁好玩,我的媽咪認真咁簡單,樣貌與身材望落不起眼,想搵多個都好難,有佢咁有型呀,冇佢咁夠盞,我的媽咪喜歡煮兩餐,約埋張太李太嚟食晏,思想開放好識嘆……」神來之筆改歌詞令賓客聽出耳油,拍案叫絕。