碧咸幫GiorgioArmani旗下EmporioArmani賣嘅底褲廣告喺日前出街，呢位外號「金丸子」嘅英格蘭國腳中場果然名不虛傳，嘩，真係好勁好性感呀！
喺廣告入面上身赤裸、淨係着住條白色底褲嘅碧咸，真係迷死好多女人、恨死好多男人。佢嗰兩舊大細適中嘅胸肌同半打腹肌，加埋佢天生異稟，連我求大俠都忍唔住要俾個「勁」字佢。現年32歲、𠵱家踢緊美職球隊洛杉磯銀河嘅碧咸咁講：「我一直好喜歡GiorgioArmani嘅設計風格，呢幾年我同太太跟佢漸漸成為朋友，今次有機會合作實在好高興。」

碧咸呢個白底褲造型，即時令我求大俠諗起瑞典型男、喺同志界甚受歡迎嘅龍格保喺多年前賣嘅CalvinKlein底褲廣告。𠵱家效力英超韋斯咸嘅龍格保喺廣告入面，身材異常突出，加埋佢小腹上面嘅黑豹紋身，引到男男女女口水都流埋。
之但係，有傳龍格保之所以咁勁，皆因佢塞咗隻襪落去，而喺佢效力阿仙奴期間，仲不時俾啲隊友當做笑柄。我求大俠唔係維多莉亞或者盧絲（被傳同碧咸有一手嘅私人助手），未睇過碧咸全相，唔敢話佢裝假狗，但英國啲傳媒就好唔畀面，攞佢喺06年夏天着白色泳褲相嚟做比較，話佢當年身材冇咁勁，所以懷疑一係底褲入面有景轟，一係張相做咗手腳。
碧咸嘅身材真又好，假又好，𠵱家咁興執相，乜鬼都執一餐，至緊要大家睇得開心同興奮啫！