想同大家講一個故仔。個故仔叫做《生產記》，即係，講生仔嘅過程。女主角第一人稱自述。

睇呢個故事之前，先聽下故事男主角（即BB爸爸）又點講先。
囡囡似邊個：「屋企人話似我，我真係唔知似邊個，我細個都好靚女。」
有冇幫手換片沖涼？「有姑娘幫手，餵母乳又唔關我事，所以只係負責抱同玩，望住BB，留意佢表情。」
講餵人奶：「好好笑，原來唔係俾個乳頭BB食奶，係要趁BB擘大口，塞個頭埋去食。」
剪臍帶？「我唔係驚，只係覺得剪臍帶嗰陣BB已經出咗嚟，意義唔大。不過見到BB一刻，確實超感動地喊。」

＿＿＿＿＿＿＿＿＿＿＿＿＿＿＿＿
（好，跟住落嚟再睇《生產記》點講。為保持原汁原味、文氣及喜感，原文照錄。）
↓↓↓↓↓↓↓↓↓↓↓↓↓↓↓↓↓↓↓↓↓
「首先25號9點幾起身痾尿，點知好似唔識停咁，仲有少少血，心諗呢啲會唔會叫做穿羊水呢？我仲喺廁所大叫陳廣偉，點知條粉蛋以為我叫佢執屎執尿，佢扮聽唔到繼續瞓覺。

「我惟有着返條褲，入房攞返部電話，嗰個時候啲水係仲流緊。打電話去到醫院，姑娘已經叫我哋即刻過去。我就入房拍醒條粉蛋，出門口嘅時候我仲同佢講，攞埋個『走佬袋』出去。點知佢同我講話唔使，佢話唔似有啲乜，人哋拍戲嗰啲唔係咁，如果真係要生嘅先返嚟攞。

「最弊嘅係，我竟然聽佢講。

「去到醫院，姑娘檢查完就話係穿羊水，即刻call醫生返嚟接生，之後條粉蛋仲同姑娘講，乜同拍戲咁大分別嘅？乜穿羊水咁平淡？姑娘同佢講嗰啲係做戲…

「之後入到手術室門口，條粉蛋換完套藍色手術室衫出嚟，好正經同我同姑娘講：『你好我係今日嘅醫生。』呢個時候麻醉科醫生行過嚟，同我哋介紹自己。點知條粉蛋好厚面皮咁講：『原來你係醫生，我以為我自己係醫生。』

「啲醫生護士喺度好開心咁樣笑，仲同我講：『你先生好搞笑』，我問返佢哋：『搞事定搞笑吖？』之後我就推入手術室，喺嗰個時候先開始緊張，因為聽好多朋友講打背脊嗰支麻醉針係好痛。啲醫生同護士好溫柔，一路叫我唔好緊張，話支針好幼，唔會痛，竟然真係唔痛。之後我下半身已經進入麻醉嘅狀態。」

「喺嗰個時候10分鐘唔使，我個女就出咗世。成個過程我都唔係好感受到好痛的感覺，聽到佢喊嗰下真係滴咗幾滴眼淚，之後望佢條粉蛋，佢已經喊到豬頭咁。醫生仲問佢:『剪唔剪臍帶啊？』佢即刻say no。

「手術半個鐘唔使就完成，原來生小朋友都唔可怕。最可怕係個老公日日夜夜對住你個女係咁影係咁影。」
＿＿＿＿＿＿＿＿＿＿＿＿＿＿＿＿
介紹番，《生產記》執筆者係陳太符曉薇（Leanne）
陳太筆下嘅粉蛋陳廣偉CKW，即係陳柏宇。
今日，陳太同Abigail出院喇！返屋企俾「粉蛋」爸爸影個夠啦！

介紹埋Abigail個人IG：　 https://bit.ly/2xM8Iti