2013年係張家輝豐收年，喺《激戰》中練得滿身肌肉，贏得全城掌聲，人人都話要練到好似張家輝咁大隻。喺事業上，家輝係票房保證，家輝憑電影《激戰》、《掃毒》，分別以4,463萬同3,029萬，榮登去年華語片票房賣座冠、亞軍，短短一年，張家輝片酬已經由2013年頭的400萬，躍升至600萬，下半年又再加到800萬，到最近已經叫價到1,200萬，認真厲害。

香港電影評論學會宣佈張家輝憑《激戰》中「賤輝」嘅細膩演出，奪得影帝寶座，揮低《一代宗師》梁朝偉、《葉問─終極一戰》黃秋生、《殭屍》陳友同埋佢自己喺《掃毒》嘅演出。

評論學會用咗以下一段文字嚟解釋張家輝點解攞影帝：「難得地將落泊小人物演得莊諧並重，形體轉變固然爆發巨大震懾力，同時小人物戲份亦顯出格外親和力，尤其與對手互動，生活化而細緻有度，偶爾即興亦甚具神采，活出了一位剛柔並濟，有情而具承擔的熟男，散發著無限男人味和人情味。」

張家輝今年有3齣戲報名提名喺3月舉行嘅金像獎最佳男主角，分別係《激戰》、《掃毒》同《同謀》，如果順利入圍，將會平咗周潤發喺1988年，同時有3部電影角色同時入圍競逐影帝。

雖然張家輝喺今次金像前哨戰大熱勝出，但係嚟緊嘅金像獎有機會分薄票源，兼且，過去梁朝偉曾提名10次金像影帝，有5次獲獎，而當中4次都係王家衛執導，分別係1994年《重慶森林》、1997年《春光乍洩》、2000年《花樣年華》、2004年《2046》，只有2002年《無間道》唔係王家衛執導而攞影帝，睇數據就偉仔贏晒，睇嚟之後金像獎又一場激戰。