中電主席米高嘉道理過往多次就香港社會發表意見，今年中電成立120周年，佢都為集團拍片，仲同家族未來接班人、囝囝兼中電董事斐歷嘉道理父子檔齊齊亮相，大談對年輕人嘅睇法。嘉道理喺片中提及，同年輕人對話係好重要：「每一個世代的人對事物都會有不同看法，只要給予他們正確的願景，由青年人自行體會，信任便自然而來」，唔通暗示有人唔聽年輕人意見？

唔少人睇淡香港前景，紛紛移民，但米高嘉道理對香港未來發展信心堅定，大讚香港人勤奮專注，會迎難而上，希望香港人要相信呢片土地唔會令人失望；面對未來，總有一道彩虹。至於斐歷嘉道理，喺片中就分享首次參觀發電廠、認識電力業務嘅童年回憶，對父親非常引以為傲。

香港一年半前爆發反修例運動，嘉道理曾喺回顧2019年時表示，2019年係香港近代史上其中一個最動盪時期，發生令人震驚嘅街頭衝突和社會動盪，目睹社會出現嚴重分歧令人痛心，仲話某啲分歧恐怕要幾個世代先能修補，同時指年輕人係香港未來，政商界領袖有責任同年輕人溝通交流，畀希望佢哋，確保佢哋有機會實現更美好嘅未來。

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！