金融呢一行，真係你爭我奪、腥風血雨、方丈真係好……話說依家交易佣金越來越平，甚至有部分仲Hard sell一世免佣。結果點呢？結果咪係大家生意難做。

呢兩日葉茂林旗下嘅耀才證券（1428）就向客戶廣發溫馨提示，你諗住有咩著數啦，點知其實係向對手插一刀，全文如下：

「耀才證券提提您：

就有關日前多份報章報導，自稱『一世免佣的證券公司』創辦人兼行政總裁，因將客戶資產20萬美元轉到自己戶口及觸犯其他嚴重違規行為，導致被證監釘牌，請客戶留意。

如要查詢請即致電作風穩健的耀才證券」

耀才呀耀才，知啦知啦，知你「作風穩健」啦；但呢個Message，同開行家名係冇分別架播，咁對家富途證券真係以「一世真免佣」做Slogan，行政總裁鄔必偉又岩岩因為上述問題，被釘牌半年。（詳細報道： http://bit.ly/2rFLHn2 ）

耀才咁抽水法，Call唔Call我返啲客回巢就唔知，至少，佢因為咁得到最少一個傳媒Coverage！另，根據Message未面意思，散戶係咪可以打去耀才問，「你好，我想問富途單嘢係點？」

掌握財經生活資訊，即Like「蘋果ATM」fb專頁啦！
http://fb.com/appledailyatm