張學友大女瑤華(Zoe)早前傳同外籍靚仔Mathis傳緋聞，不過學友今早返港，解釋呢個外籍男只係朋友，而個男仔亦未結婚(新聞連結： http://bit.ly/2tLhLr3 )，學友再講：「囡囡對於影響咗啲朋友都覺得唔好意思，呢件事又未經證實，不過知道大家都係出於關心，但係對於一個小朋友，尤其係我哋嘅下一代，嚟緊都好多喇!好似華仔個囡囡，十幾年之後，可能都要面對呢啲事。」

問到大女有冇拍拖，學友坦言有問過囡囡，暫時未有呢個興趣，咁贊唔贊成囡囡拍拖，學友話：「當然佢哋好細個，我哋仲保護緊佢，但佢o依家都16、17歲，過多個幾月佢就17歲，如果佢真係正式去結交朋友呢，冇咩大問題，唔好影響到學業，不過自己都覺得做我哋小朋友有一定困難，即係囡囡都會覺得：『點解我影一張相都會俾人哋講？』對於我嚟講都會比較難處理，因為始終囡囡都仲係咁細個。」

學友直言呢件事上，囡囡覺得唔開心，影響到朋友，學友又話：「雖然我要做騷，不過都抽咗啲時間同囡囡解釋呢件事，可能由細到大，囡囡都係讀國際學校，比較洋化啲，所以呢個係文化上面嘅差異，亦都唔想因為自己嘅關係，要佢唔可以阻止佢用社交媒體，好似facebook同Instagram，囡囡都已經特別小心，覺得今次只不過係一個誤會，因為個男仔冇用到真正身份出嚟講，但係個男仔嚟緊都會去外國讀書。」

咁學友介唔介意未來女婿係外國人？學友話：「呢啲唔到我講！」囡囡拍拖使唔使一定要見家長?學友笑言：「唔使喇!唔使喇!通知我一聲，知道就算㗎啦！」學友又指冇follow囡囡嘅fb同Ig，唔想囡囡覺得被監視。