IG常客鄭秀文（Sammi），無論做運動、着新衫抑或煮嘢食，都會相機行先貼上網開心share。噚日佢喺爸媽屋企玩自拍，拍自己之餘，仲將身後着住一身棗紅色睡衣嘅老爸攝入鏡。

片段中，Sammi爸爸雖然拎住柺杖，不過就好精靈，見阿女拍片仲揮手望鏡﹗揮完手後，老爸自顧自搲肚腩﹗Sammi見到老爸咁搞鬼，都忍唔住留言︰「一切都係浮雲。做人最緊要自在C服，所以，My Dad話知你影緊，自由自在咁 『抓肚腩』。 」

Sammi留言大讚老父一身裝扮，係時下最潮嘅睡衣Look，仲問推出自家品牌睡衣嘅關之琳，可唔可以贊助老爸睡衣㖭？

咁Sammi開到口，關之琳點會托手肘？啱啱佢就喺Ig回應咗Sammi話：「父親節快到，同爸爸一齊着父女裝。」