德國斯圖加特網賽賽程喺上周六出爐，因服食禁藥而被罰停賽15個月嘅俄羅斯靚女球手舒拉寶娃，喺周三復出首戰會硬撼世界排名第35嘅34歲意大利老將球手雲芝；而30歲嘅舒娃表示，自己已經為今次復出準備就緒。

另外，ATP巴塞隆拿網賽喺今個月24號就會開打，但曾經喺2014至15年蟬聯冠軍嘅日本球手錦織圭，喺周六就宣佈因為手腕受傷而退賽！現時世界排名第5嘅錦織圭喺聲明中表示：「巴塞隆拿網賽係我最鍾意嘅比賽之一，但好遺憾我嘅右手手腕有傷，我需要更多時間休息，因此決定退賽。我會同我嘅團隊飛返佛羅里達，希望可以盡快傷癒復出。」由於錦織圭退賽，令「泥地王」拿度衛冕嘅機會大增。