余文樂同王棠云結婚，兩人八字係咪好夾呢？堪輿家麥玲玲接受《蘋果》電話訪問表示：「其實ok嘅，樂仔屬雞，太太屬龍，龍同雞係好朋友，係合嘅，但五行嚟講，一個秋天，一個冬天，冇乜話特別互旺，但相對上都算係一個中上姻緣，唯一係老婆八字本身有幾粒紅艷煞嘅星，相對上桃花比較旺，惟有抗拒吓一啲誘惑，因為男仔嘅命本身亦都係桃花旺，即係大家都桃花旺嘅時間，就要撇脫啲咁解啫。」

問到兩人命格幾時會生B？玲玲師傅話：「睇番流年嚟計，其實今年年底、明年都好大機會有喜。」有傳兩人雙喜臨門，師傅表示：「都似㗎，結婚年有喜嘅運好強，兩個命格呢兩年有小朋友機會好高，都係一兩個子女，唔係特別好多。」師傅仲話今日適宜嫁娶：「今日日子叫平日，有平穩意思，幾穩定，佢哋選擇唔喺香港註冊，喺澳洲註冊，比較利男士，樂仔嘅命配異地姻緣嘅穩定性係高好多。樂仔本身命格係財旺，反而女仔結咗婚之後，佢嘅命格唔錯，幾享到夫福。」

今年咁多藝人結婚，係咪好年呢？玲玲師傅表示：「今年雙春兼閏月，特別多人結婚，尤其樂仔今年本身係本命年，太太今年合太歲，明年係相沖年，所以都係好合適有喜事。」