近排泰國片非常熱爆，除咗有橫掃各大獎項嘅戀愛小品《戀愛病發》(Heart Attack)，亦有於泰國票房過億，校園犯罪喜劇《出貓特攻隊》(Bad Genius) 。呢套戲喺泰國不足兩個禮拜票房就破億，仲紅到衝出亞洲，於全球都大受歡迎。套戲就講家境一般嘅Lynn憑屈機成績考入名校，一次考試因為心軟放水幫好友，點知惹嚟一班富二代出錢請佢出貓。Lynn最後敵不過金錢嘅誘惑，諗出連串超乎想像嘅出貓方法，生意仲愈做愈大﹗預告片入面所見，佢用彈琴嘅方法通水教人做選擇題，令人諗起《逃學威龍》入面周星馳叫吳孟達拋生果出貓，不過就更加有創意，確實新奇、刺激又有趣。