韓國SBS綜藝節目《Running Man》（RM）於2010年7月首播，早前導演就透露正準備拍攝7周年特輯，當時已開聲表示想邀請開播時一齊拍攝嘅元祖成員宋仲基，以及合作多年嘅Gary任嘉賓，而二人會唔會真係拍攝特輯就仲未知。另外，SBS早前宣佈已製作動漫《RM》，而且將於下月尾播出，不過原來事前未有知會節目組及成員。

動漫《RM》取材自綜藝節目《RM》，長頸鹿、老虎等七種動物將代表自己種族，參加撕名牌等比賽，動漫每集30分鐘，共24集。SBS相關人士表示：「動漫《RM》係取材自節目《RM》，不過未提前通知相關人士，我哋向透過新聞或預告片知道呢個消息嘅《RM》節目組及成員表達歉意。」又透露是次動漫仲包括已退出節目嘅Gary，雖然SBS事前未有告知Gary此事，不過Gary隨後知道之後都給予理解。

另外，Gary早前去咗夏威夷度假，嘆盡美食，不過佢都好注重健康，噚日就於Instagram公開練拳嘅短片。