徐濠縈、鄺文珣夫婦、盛品儒夫婦、王浩信、陳美詩等，今日到灣仔會展出席香港國際時裝匯展。其中大劉劉鑾雄太太陳凱韻（甘比）被《蘋果》獨家拍到再度懷孕（新聞連結： http://bit.ly/2gLzKvm ），作為甘比好友嘅阿徐受訪時話：「之前已經恭喜咗佢。」問佢有冇同甘比分享陀B經驗？佢話：「唔使啦，佢經驗仲多個我，我都10幾年前啦，佢身邊朋友應該有更update嘅資訊俾佢。」

問到阿徐同老公陳奕迅（Eason）又有冇計劃追多個？阿徐話﹕「之前有試過，o依家就隨緣啦，自己又鍾意運動，做生意又周圍飛，而且好享受同包包（女兒陳康堤）嘅時間，有時Eason飛咗，同包包可以一齊去旅行，一齊行街食嘢好開心。」講到Eason再度開騷，但門票只短短10分鐘就售罄，阿徐話今次好公平：「我一張飛都冇留起，所有人都冇。」

而挺住巨肚現身嘅鄺文珣受訪時話，預產期係本月底：「今次已經係第三胎，心情冇咩緊張，但上網睇人話第三胎會好早，有啲37週就會生，我o依家36週，有少少驚，係咪唔應該行咁多？所以今日嚟都有少少擔心，好彩有老公陪。」鄺文珣又話BB性別暫時保持神秘：「遲啲會講，但中英文名都已改好。」

至於同老公盛品儒行孖咇到場嘅蔡一鳳，今日以低胸性感裝現身，兩人一直表示有「好事近」，問到係咪有好消息公佈？盛品儒話：「話日日都有好消息，遲啲講得會講。」而蔡一鳳就為性感打扮解畫：「趁o依家仲着得就着，遲啲怕着唔到。」睇嚟真係好快可以公佈喜訊。