特首林鄭月娥「年年考第一」就係人都知，估唔到連跟過佢嘅新聞秘書都「好讀得」，喺史丹福「讀」遍天下同學考第一。

曾經喺林鄭2012年接任政務司司長之初，做過林鄭新聞秘書、其後調任至觀塘民政專員嘅羅莘桉（Gilford），去年喺政府資助下負笈史丹福，一年寒窗苦讀，終於喺6月16日行畢業禮，佢嘅用功不單冇白費，仲為香港政務官甚至華人爭光。

Gilford除咗獲頒授商學院管理理學碩士學位（Master of Science in Management，MSx）以及公共管理及社會創新證書（Certificate in Public Management and Social Innovation），仲因為成績優異，榮獲「Robert L. Joss Scholar」稱號，更巴閉嘅係，佢喺全球幾百個包括外國高官、商企領袖同高層等「精英」同學中，展示香港AO獨有實力，揮低佢哋考到全班第一名，榮獲首屆George G.C. Parker Prize殊榮，佢個大名，從此刻喺史丹福商學院大樓牌匾，永留印記。

據知Gilford都喺facebook報喜，話對成為MSx全班第一「喜出望外」，對於成為George G.C. Parker Prize首位得獎人，「為華人爭光，榮耀歸於上帝！」唔知學成歸來嘅Gilford，之後會喺邊個新崗位，再展所長？