周日（18日）沙田日賽，沈集成馬房其中三匹參戰馬，為第1場「永益善」由莫雷拉、第7場「力奇先鋒」拍潘頓及第8場打吡馬「同樂日」與羅理雅，今朝（15日）早上7點10分左右，均安排往千八米草地出試。

人馬在出發前，練馬師沈集成與上述三位一級大師傅在欄邊開會討論一番，此路人馬雖然今次出馬唔多，但動靜就一啲都唔簡單，值得多加研究。

首先見「永益善」草地單跳800米，躁火收歛，步頭上力，成熟再進；其後「同樂日」則聯袂「力奇先鋒」草地拍跳800米，前駒後追有力，進步持續，後駒在前領放，火冒勁增。

課罷後，在烽火台觀看走勢的倉主成哥，拿拿聲起程趕返沙圈接馬並向三位騎師輪流詳加追問，動態相當肉緊，睇嚟此路人馬又有動靜。