【被張文慈出賣】「精誠盡處非金石」李麗珍潘源良關係橫跨三十年
分手戀愛季節潘源良李麗珍張文慈三離三合新藝城
潘源良同李麗珍四度離合,潘源良今日被揭日前喺加拿大多倫多再婚,珍妹同樣亦喺加拿大居住,不過就同阿源一東一西,珍妹身在溫加華陪個女許倚榕讀書。《蘋果》記者透過李麗珍好友聯絡珍妹,欲問佢對潘源良再婚回應,但珍妹透過友人表示:「不回應,謝謝。」
52歲嘅珍妹,感情世界一向豐富,且有「翻撻」前科。其初戀男友,係狄波拉細佬柏德烈,有傳佢之後同香港小虎隊成員林利拍電影《瘋狂遊戲》時曾經撻着,但幾個月之後,珍妹同柏德烈翻撻。
珍妹先後戀上漫畫家祁文傑、太極樂隊成員雷有暉、錢嘉樂同潘源良,1996年珍妹同許愿結婚,生下女兒許倚榕,但兩個係2000年離婚收場。至2004年,珍妹同已婚嘅髮型師馬桂燦(Jacky Ma)傳出不倫之戀。
喺珍妹多段感情中,最為人注目係同潘源良,佢兩個1986年合作電影《戀愛季節》相愛。潘源良當年喺新藝城做幕後,與新藝城力捧嘅「開心少女組」成員珍妹唔同組,從來未有見面嘅機會,直至86年潘源良搵珍妹合作電影,兩人好快就撻著。
及後潘源良離婚,但與珍妹未有發展。到咗1992年兩人再聚,再分手;至2007年,潘源良同珍妹又再次碰面,最難得係大家都覺得對方冇太大嘅改變,再度復合,至2016年初分手。據傳分開理由是珍妹與前夫許愿所生的19歲女兒許倚榕,一直不接受潘源良。
呢段橫跨三十嘅戀情,仲「攝」咗一個女人,佢叫張文慈,亦即係珍妹嘅好姊妹。就係因為佢喺微博貼圖,暗示珍妹同潘源良分手,仲寫道:「儍豬~忘記他吧!鞋若不合穿,勉強著也是痛!世界上總有懂得珍惜你的人在等著你!!!go~go~go~我和珍妹開心台北之旅出發了!」導致好姊妹反目。本想低調處理情變嘅潘源良亦無奈以「精誠盡處非金石,眾口無權置一詞」作回應,默認分手。
張文慈(左)貼出與珍妹出發台灣的照片,並留言暗示珍妹與潘源良分手。