無綫劇集《銀樓金粉》昨日在鯉魚門一海鮮酒家舉行聯歡晚宴，秦沛、伍衞國、薛家燕和伍詠薇四人打算一齊請客，薛家燕說：「伍衞國一嚟到就發現個宣傳板上面冇佢個樣，問點解冇佢幅相，佢話套劇係咪冇佢份做，佢有少少嬲，所以佢話唔畀錢，我會叫酒家負責人同佢傾傾，都係小誤會。」

家燕姐續說：「呢部劇本來話拍三個月，𠵱家兩個月就搞掂，大家拍得好開心，原本係預計擺三圍，點知有咁多人報名，𠵱家要開十圍，難得大家咁開心，所以我仲問咗好多贊助商贊助禮物，今晚會有個大抽獎。」
楊思琦則表示拍《銀》劇很開心，她說：「雖然係拍苦情戲，但係大家好開心，噚日拍埋個火燒場口，話我哋睇住Paul哥（秦沛）活生生俾火燒，真係好慘！」
採訪、攝影：楊潔雯