唔識國情點做建制派？所以民建聯同工聯會兩黨領導層都喺本月初北上研習，特首辦主任陳國基亦喺月中率領政治助理訪京一星期，為政助嘅仕途增值「升呢」。而喺今日，中共中央書記處書記、中央統戰部部長尤權就接見咗民建聯訪京團；點解八方會知？因為新華社有報道，除指中央支持呢個香港第一大愛國愛港政黨，尤權又特別呼籲佢哋「堅守初心，一以貫之」，繼續支持特首施政，唔通中央都feel到，民記同林鄭唔多啱key？

報道話喎，尤權指中央高度重視香港，堅定支持香港繁榮發展，又大力推動香港融入國家發展大局，講完呢啲大路嘢，尤權就讚民建聯係香港愛國政團嘅一面旗幟，為香港平穩過渡、順利回歸同繁榮穩定作出重要貢獻，內容都唔令人意外嘅，但及後有8粒字，可圈可點。尤權指，希望民建聯「堅守初心、一以貫之」，繼續支持特首同特區政府依法施政。咁啱喺近期香港嘅港獨爭議下，建制內包括唔少民建聯中人都認為林鄭單係話「譴責」唔多足夠，圈內怨氣唔少，難免令尤權呢8粒字，特別令人覺得有意思。

尤權同時冀望民建聯積極引導香港社會聚焦經濟和民生，著力增進愛國愛港陣營團結，進一步加強自身建設，喺新時代展現新作為喎。