煲呔曾同攞命陳為幫政府遮醜，不借每年花幾千萬元公帑，請班副局長、政治助理做「政治化妝師」，誰知呢班「化妝師」未幫人化妝，自己已經搞到不似人形。「政治化妝師」治港勢成，即將迎戰9月立會選舉嘅民主黨（又名白鴿黨），原來都暗中請嚟一位星級大師幫手，大家咪誤會，唔係禮賓府心戰室要員劉細良回巢，而係著名形象設計師劉天蘭拔刀相助。
八方聽聞，劉天蘭今次肯幫白鴿黨做顧問，同發生喺19年前嘅「六四」事件都有啲關係。劉天蘭前夫岑建勳，當年係民運中堅分子，幕前，佢係「民主歌聲獻中華」主持，幕後，佢喺營救民運人士「黃雀行動」擔任重要角色，由於白鴿黨主席仁哥同岑建勳有多年交情，所以搭上搭請到劉天蘭幫手。

政客靠把口忌口臭

據講劉天蘭近月開始，大約每兩個星期會同部份準候選人見面，佢擅於形象設計，主要教路如何改善形象，絕冇畀政治意見。政客靠把口搵食，劉天蘭話從政千萬不能口臭，唔係亂噏廿四，冇好嘢講好似林D9嗰隻，係真係要避免有口氣，因為政客成日要面對市民，一開口臭死人就唔好啦，佢建議最好每半年搵牙醫洗牙一次，仲要多食水果令腸胃健康，亦可食靈芝丸補身，平日隨身帶備薄荷片，咁就萬無一失。
政客經常要企街嗌咪拉票，日曬雨淋好傷皮膚，劉天蘭提醒大家要搽定防曬乳液，最少要SPF30或以上，怕聲沙失聲，常備無糖喉糖最好；多面油嘅人，要袋包吸面油紙出街，否則市民見到你塊「煎蛋面」就唔開胃。另一樣劉天蘭特別提到嘅，係要帶多件衫替換，唔係貪靚，而係免得汗臭惹人討厭。
有白鴿黨人話，黨高層希望劉天蘭能打救四個準備出戰立會選舉嘅「第二梯隊」成員，即係甘乃威、張賢登、黃成智、胡志偉等四人，不過初步觀察未見顯著成效，除咗張賢登形象好似年輕咗外，其餘三人都冇乜起色，就算劉天蘭叫佢哋用名牌磨砂膏，甘乃威皮膚仍然麻麻哋，有人好肉緊咁講：「甘乃威始終係甘乃威，唔係甘迺廸（前美國總統）。」

mailto:[email protected]