「索腿天后」陳敏之喺去年冬至誕下囝囝「雷冬至」(乳名)，今日BB滿月喇！媽咪敏之今日喺微博貼上抱住囝囝嘅合照，留言﹕「Happy One Month Old My Baby！ Mami love u!」唔少網友都讚BB好靚仔，真係遺傳咗媽咪嘅美麗基因。

今日敏之為新劇《親親我好媽》去到馬鞍山做宣傳，同場仲有江美儀、黃智賢、米雪等。敏之剛坐完月首度復工，當然成為焦點，見敏之個樣冇乜點變，但身明顯圓潤咗好多，上圍由A級變D級好澎湃，連厚厚衛衣都遮唔住豐滿身材。敏之透露依家餵人奶，雖然好辛苦，但見到BB肥肥白白好意，乜都值得。敏之好開心咁話﹕「佢好長，有十幾磅重，原來做媽媽真係好偉大，無論是幾疲累，都會不停揼奶。而湊小朋友亦有好多學問，真係估唔到佢哋脾性，但睇住佢肥咗好多，下巴仔、蝦餃仔細細粒，雙下巴好得意。」

敏之話出嚟做活動一陣已經好掛住個仔，所以遲啲拍《深宮計》都要搵屋企人幫手，佢仲話依家好冇記性，出街經常帶漏嘢，希望拍劇後會有所改善，笑言﹕「我諗開工係最好修身方法。」

另外，黃智賢同江美儀話唔擔心新劇係農曆新年呢個炮灰檔期出街會影響收視，黃智賢話﹕「初十先播，應該放完假返嚟啦。」