噚日嘅Magnum（2080）賣殼劇本，表面上係爬格子爬得吸引啲，實際作用俾精明眼鄰居菲菲同高明發現咗。無錯！就係可以呃位寫少啲字。點解咁陰功？你睇全日成交僅僅過400億銀，奀豬到不得了，三大龍頭股滙控（005）、中移動（941）同騰訊（700），全日高低波幅得1%，世界盃完咗兩個星期，但戰友睇嚟仲未歸位。

品質國際有盈喜護身

未歸位嘅原因有好多，可以係等業績，可以係等滬港通，更加可以係死心。但大家其實唔使咁灰，指數唔升，成交唔夠，二三線股依然狂野，睇番十大升幅榜，冇15%升幅都入唔到圍，總成交達7億銀，佔大市比例約2%。千祁唔好睇少呢2%，散戶參與含量隨時超過一半，即係林鄭所講嘅主流意見，性價比極高。
Magnum喪升24%，證明殼股有價，如果傾開賣殼嘅，就更值得加分。品質國際（243）2012年9月曾表示有非常重大收購洽談，最後無疾而終。今年1月又傾過收購內地體育用品公司，但亦泡湯收場。有趣嘅係，品質股價竟較過往兩次公佈交易告吹時更高。兩個原因︰一、殼價越炒越高；二、有更好嘅消息跟尾。品質國際最新市值3.1億銀，仲要有盈喜護身，唔使驚好似個別妖股咁，喪炒一輪後忽然落閘發盈警。從圖表出發，年初以來正營造大圓底，噚日一棍衝上0.405元，創四個月新高，喺殼股瘋潮下，保守估計要炒上0.5元！

唐牛
https://www.facebook.com/tongcow88