崔建邦啱啱冧掂無綫高層樂易玲獲解凍,呢頭走出雪櫃,嗰頭又掛住媾女,被人發現本月18日郭思琳喺崔建邦屋企過完夜,女方仲喺冇遮冇掩嘅落地玻璃前換衫,同一間房走出嚟嘅崔建邦就赤膊出嚟準備燙衫。郭思琳為遮掩倦容,戴住副大黑超,但難掩嘴角含春離開。崔建邦雖速食完郭思琳,但過咗幾日又召唐詩詠過嚟新屋短敍,享盡齊人福。
馮仁昭噚日打畀崔建邦新歡郭思琳,佢否認戀情:「我識咗Amigo(崔建邦)幾年,嗰晚我哋好多人喺屋企,我飲咗酒咪瞓着咗,我當晚瞓梳化,Amigo同阿哥瞓。」佢笑住話冇同崔建邦發生親密關係,仲得戚話:「我冇斷片,我酒醉有三分醒,會打番畀Amigo講番件事。」
郭思琳仲話唔會避忌,會照call埋班朋友去崔建邦屋企。郭思琳會唔會考慮同崔建邦發展,佢話:「我鍾意高大嘅男仔,但Amigo係好男仔。」
唐詩詠就懶理崔建邦劈腿,佢噚日喺電話度話:「人哋啲事,問番佢哋,我唔方便講。」仲會唔會到訪崔建邦屋企,佢話:「我近排好忙,得閒先應約。」有指唐詩詠近排大把人追,佢聽後笑唔停,仲懶神秘反問:「你點知,到時有咪知囉。」崔建邦就潛水唔覆機。