出爐「大閘蟹小姐」蘇慧恩噚晚喺九展舉行嘅《賞．激想》2016夢想啟航音樂會，着住透視背心裙登場。本身唔多自己歌嘅佢，全晚勁唱別人的歌，包括張信哲嘅《愛如潮水》、王菀之嘅《我真的受傷了》等。

蘇慧恩喺台上又唱又跳，到咗性感舞嗰part，相信係佢太投入，跳到南半球都跌出嚟。而佢又為今次演唱會學咗兩個月鋼琴，特別自彈自唱送畀父母同婆婆。之後唱到快歌medley，蘇慧恩換上黑色緊身body，大騷長腿，同dancer齊齊跳性感椅子舞。

嘉賓之一嘅黃健東出場唱返佢早前喺網上熱爆嘅改編《APPA》，之後蘇慧恩換咗黑白透視裙，同黃健東合唱《一事無成》。黃健東喺台上話蘇慧恩參加過超級巨聲、香港小姐同大閘蟹小姐：「你到底係多毛定多膏呢？」蘇慧恩即刻尷尬笑話：「我係多膏，因為要揭開隻蟹先知多唔多膏架嘛，好似我咁，入面好純潔。」之後再有可嵐、應昌佑等擔任嘉賓。