到底是莫雷拉太勁？抑或韋達等一眾騎師回塘？昨晚（14日）雷神又表演，新接手「蒜頭爺爺」、「萬馬飛騰」及「開心駿馬」，前兩駒上次用韋達，固然唔同晒！更犀利，還是從郭能手上接手後駒，居然唔放都贏。

莫雷拉平衡力超勁，跑谷草確好煞食，彎位先發制人，入直路火速令馬重拾平衡，然後換腳再衝，他認第二，當今無人可認第一。

今次莫雷拉也有數匹新座騎，最受注目應是接手潘頓跑開的「靚加加」與「美麗寶寶」，還有「漸信名駒」及「追風追月」。

「靚加加」及「美麗寶寶」操練安排，亦與別不同，無如慣常般在今朝（15日）跳，反而提前在昨早做最後試跑，莫雷拉更為此兩駒到場，他當時只操四駒，大摩佔三匹，另一是「追風追月」。

點解大摩會安排提早跳呢？我唔知。只知「靚加加」及「美麗寶寶」，都比上次又進一步，期待落在莫雷拉手上，會有更好表現。

除上述新座騎外，莫雷拉再騎數匹騎開的馬，尾場「首飾大帝」正是上次殺低「美麗寶寶」的馬，今次升三班遇到「怪獸家長」，負磅相差17磅，憑較主動跑法，未必一定實輸！

除此兩熱門外，可留意冷門是「鎏金驃」，三歲馬無疑輸經驗，但跑過兩場後，喜見賀賢肯繼續逼，鍾意在進步較預期更大，縱田泰安放手，改用巴度，也會視為第三勢力。