香港電視娛樂(港娛)預計明年4月1日接亞視棒開台，為免自己打自己，nowTV部份收費台亦要「摺埋」，《娛樂審死官》噚晚播映最後一集，主持人梁思浩喺小西灣一間酒樓擺咗兩圍請台前幕後食飯，拍檔Kawaii、李麗蕊、監製Jimmy等均有出席。思浩話唔愁出路，除咗有線同電台仍有節目出街，同港娛新合約亦都傾得七七八八，問佢叫高價有冇嗌高啲？佢話:「羅燦(前無綫高層)教我免費台要叫貴啲，但佢哋如果肯原班人馬喺免費台開同一個節目，我就唔加價。」
至於梁思浩拍檔Kawaii就未有咁好彩，港娛未有同佢傾續約，問佢有乜難忘事？佢話：「當日係以經理人身份做節目，都擔心自己做得唔好，但做落就有人主動搵我幫手澄清番啲嘢。好似之前施念慈同DaDa嘅糾紛、戴夢夢同前男友分手，仲有我同王喜為一單嘢反目，節目出街後見到佢都有打招呼，但能唔能夠做番好朋友呢，暫時仲未係。」