台灣歌手、35歲嘅楊丞琳同細佢一年嘅內地歌手李榮浩拍拖近五年，感情穩定，今年7月李榮浩生日，佢哋去海島度假慶祝時，李榮浩就以3卡鑽戒向女友求婚成功。上個月楊丞琳喺記者會上透露兩年內完婚。不過上個月內地發出「暫停大陸居民赴台個人遊簽證」新政策，呢對異地戀未婚夫妻見面出現危機，噚日就有內地網民爆料，佢哋已喺安徽合肥結婚，網友仲話有同學喺民政廳工作，親眼目睹佢哋領結婚證。

對已領證一事，李榮浩所屬華納音樂噚日回覆話：「謝謝大家關心。」而楊丞琳親自回覆台灣蘋果新聞網，同樣以謝謝關心回應，似乎默認已經領證結婚。據密友透露，楊丞琳冇懷孕，並預計明年舉辦婚宴，聽日佢出席手機遊戲代言活動時，相信會親自回應。

「素質在哪裏」

另外，有網友前日喺高鐵站巧遇楊丞琳同李榮浩，見到佢哋親暱手挽手，不過楊丞琳似乎對呢件事好嬲，前日佢喺Ig限時動態，突然怒斥狂迷跟蹤嘅行為。楊丞琳先後出兩個post，分別寫上「我本來不會跟影響我私生活的粉絲有任何互動，你／妳不尊重的時候，我也不需要尊重你／妳。追星不是這樣追的，素質在哪裏呢請問？」，以及「跟蹤和追星不一樣，請搞清楚。」
撰文：馮仁昭