據知田少經過明查暗訪，發現「金鐘仁」就係馮煒光。田少日前同八方講，唔介意外界作任何評論，但必須合乎事實，但「金鐘仁」竟然話自由黨為辣招拉布，查吓資料都知啦，拉布嗰啲議員唔係佢哋個黨，佢亦好不滿「金鐘仁」無啦啦話自由黨因為財團利益而唔支持辣招。向來夠吉士公開片狼英嘅田少，更加不滿有人要發炮又唔敢以真名示人，搞啲咁鬼祟嘅行為，唔通自知水平麻麻而無謂開名？
八方前晚曾向IC查證，到底佢係咪一如田少所言，係「金鐘仁」嘅真身？可惜未獲回覆。事隔一日，IC終於蒲頭，但只透過特首辦回覆，先指官員解釋同說明政府政策時，會以其公職身份作闡述，繼而話喎：「專員對揣測性的傳聞不作評論」。
查實如果唔係「金鐘仁」，又使乜唔否認呢？呢啲似乎叫做此地無銀嘞。睇嚟田少同狼英大鬥法嘅好戲，日後多個丑角刺激收視嘞。有政界中人發現有個網民「金仔」經常喺網上留言，思路言論同馮煒光好似，懷疑都係佢嘅分身。