菜園村最近幾乎日日開片，落得呢個場嘅保安員絕對唔係烏合之眾。香港柔道學會創辦人黃柱光斷定，上周嗰位將朱凱迪撻生魚咁撻嘅保安員，當時係用咗正宗柔道招式「浮腰」。黃教練仲讚保安員動作到位、有板有眼，似係習武之人，睇嚟村民有排驚。

菜園村巡守隊員朱凱迪俾人撻落地嘅影片喺網上瘋傳，素未謀面嘅黃教練睇到啲網民話阿迪唔啱覺得忿忿不平，「啲網民話朱凱迪郁手先，拉人又推人。專業人士一睇，就知個職員係攻擊緊佢。」佢參詳過關注組同埋港鐵拍嘅版本之後，斷定撻生魚招式就係聞名不如見面嘅「浮腰」。
港鐵片段顯示，阿迪好似拉住保安員隻手咁，黃教練話呢個時候保安員已經進入攻擊狀態，「佢扣住朱凱迪條腰，膊頭壓住佢少少，等佢唔舒服重心向前。」之後保安員突然退後，好似阿迪推人咁，其實呢吓叫「破勢」，黃教練解釋：「朱凱迪重心喺單腳，冇可能推到人。反而個職員紮行馬，退一步帶住佢擰身……嘭！飛佢出去！」
黃教練噚日第一次入菜園村，想搵阿迪講解呢吓招式，等佢唔好傷得不明不白。佢一入去見到啲警察抬人，火都嚟埋，動口不動手，破口大鬧：「嘩，原來你哋啲差佬咁惡！」
俾黃師傅鬧嘅差佬當然睬佢都儍，繼續抬村民離場。呢個時候八方發現成班PTU人牆後面有一個熟識嘅面孔，就係剛離任嘅一哥「SorrySir」嘅寶貝仔鄧智兆。朝早有記者出盡長短鏡想影低佢執勤個靚仔樣，點知鄧督察好怕醜，塊面成日擰埋一邊，同袍直頭讓條路出嚟叫佢返去隊後面。

佢企後面繼續擺甫士，英明神武咁蹺埋對手。到警察抬人，作為督察嘅佢唔使落手落腳，淨係企喺後面伸個頭裝吓裝吓，到示威者抬走晒先出嚟。八方建議鄧公子同記者傾吓偈練大啲個膽，咪唔會怯場囉。
mailto:[email protected]