恒隆地產（101）舊年盈利跌逾五成，加上𠵱家中港經濟同零售市道麻麻哋，佢哋都要節流，慳得就慳，春茗由會展改去九展搞，管理層坐高鐵返內地只坐二等座，就連太子爺陳文博（Adriel）都以身作則，西裝400蚊人仔搞掂，遲啲可能要餐餐食麥記㖭呀。
最近同恒隆董事總經理陳南祿（Philip）、Adriel坐低傾偈，原來慳皮已經成為恒隆由下而上嘅共識。Philip提到，公司上周四喺九龍灣展貿舉行春茗，費用比喺灣仔會展搞平好多，氣氛亦好。

坐高鐵二等座

集團傳訊助理董事關則輝甚至連車費都慳，佢同Philip、Adriel等一班管理層返內地巡視旗下商場，會安排坐高鐵二等座。
關則輝解釋，4粒鐘高鐵車程，二等座只係400蚊，頭等就要成千幾元，5個人就慳到5,000大元，幾好喇。
34歲太子爺Adriel亦慳家，佢6年前返恒隆幫手，2012年開始做董事總經理行政助理，跟Philip學做生意。佢呢日身穿一套米色西裝，並非名師設計或大牌子，而係佢喺上海一個市集入面，搵來師傅度身訂做，佢自己揀埋料，只係400蚊人仔咋。
不過，Adriel暫時都未能被封為「慳家富二、三代」之類，事關華置（127）主席劉鳴煒肯定排頭位，劉鳴煒慳到要喺facebook話畀大家知佢鍾意食麥記，Adriel仍需努力啊。

李華華
mailto:[email protected]