嚟緊星期日立法會選舉，金融服務界有三人參選，競爭激烈，早兩日有傳媒引述消息指，中聯辦疑似為競選連任嘅張華峰拉票，並批評其他參選人，對手詹劍崙立即反擊，仲拉埋幾位股評人做啦啦隊，正所謂輸人唔輸陣吖嘛。
市傳中聯辦官員早前現身中資證券業協會活動，幫張華峰拉票，踩詹劍崙喺證券業係「一張白紙」，激到詹劍崙紮紮跳，噚日專登開記者會澄清，散戶熟識嘅股評人黃德几、鄧聲興、藺常念、熊麗萍等亦現身撐場。

詹劍崙：唔好再使橫手

詹劍崙反擊話，一畢業就入行，乜位置都做過，家陣係股票分析師協會理事，業界經驗絕非白紙一張，仲話自己不嬲我行我素，臨時決定參選都係自己意思，背後冇推手咁話，佢又呼籲對方「行番正路，唔好再使橫手。」
中資證券業協會一直無就傳聞回覆，咁啱協會副會長陳爽噚日現身光大控股（165）業績會，問佢有冇拉票一事，爽哥淨係話「這個我不太了解，沒聽過。」咁佢會唔會支持張華峰？佢答話「他人很好！」哦，明白了。
聽聞，有人已經向選舉事務處投訴中聯辦疑似拉票，唔知成件事最後點樣收科嘞。不過香港人𠵱家最討厭中聯辦插手，金融服務界大約600票，中資券商佔一部份；結果係點？投完票自有分曉。金融服務界候選人尚有徐聯安。

李華華
mailto:[email protected]