新世界發展噚日舉行股東大會，萬眾期待嘅主席鄭家純（圖）究竟有冇出現呢？登登登凳，純官仍然係甩底嘅。
查實今年4月，已經有傳媒影到純官跑得走得，7月嘅時候執行副主席兼囝囝鄭志剛（Adrian）仲預告純官下次業績會同大家見面，但股東會仍然見唔到純官身影，Adrian話爸爸仲係康復階段，適當嘅時候會出嚟活動喎，咁即係要等到下年喇。
至於純官細佬、新世界非執董鄭家成會後就話，大哥有返工，身體目前都OK㗎，仲話多謝大家關心㖭。至於會唔會退休養吓身子呢？鄭家成就話純官應該會繼續做落去。

大學生首置盤未研究完

另外，𠵱家唔少大學生期待新世界將會推出嘅首置計劃，究竟進程如何呢？Adrian話仲係研究當中，遲啲會公佈。至於香港樓市前景，佢就話預期美國加息步伐會比想像中慢，對未來樓市審慎樂觀，會循序漸進推盤咁話。
Adrian重申睇好內地電競市場，又話𠵱家內地差唔多兩億人有玩電競，未來將會繼續喺9個城市嘅K11商場搞VR體驗館同電競酒吧喎。
講番個股東會重選董事結果，紀文鳳同埋鄭家成囝囝鄭志恒嘅得票只係僅僅多過70%，都算係出奇地低，唔知乜原因呢？

李華華
mailto:[email protected]