仲有幾日就踏入9月，率先開學嘅就係幼稚園同埋返學前班嘅小朋友，今日已經開學喇！

位於銅鑼灣一間名牌幼稚園，過往都深受藝人、名人歡迎，今日關心妍（Jade）同劉倩婷，就分別帶囡囡返校。今日大約下午1時，關心妍由家傭陪同下，拖着囡囡楊榮心﹝Jovia﹞首先抵達學校，超級可愛嘅Jovia見到記者影相都好淡定，自己揹住書包仔，拖住媽咪行到彈吓彈吓咁，去到學校門口，見到媽咪同其他家長打招呼，佢都有揮揮手同人Say hi，不過Jade似乎好趕時間，送咗囡囡入學校之後即急步離開。

另一位星級媽咪就係劉倩婷，前年3月為老公李丞責誕下囡囡阡辰，今日湊住就嚟兩歲半嘅阡辰返學，同囡囡坐七人車抵達學校嘅劉倩婷，直接叫司機將車駛咗入學校，有別於其他家長將車停喺學校門口再拖子女行入去，囡囡由佢手抱落車，劉倩婷見到記者，仲叫囡囡同大家打招呼，不過囡囡唔知係咪未慣返學，全程攬實媽咪，兩母女今日仲齊齊戴住黑超添！

精選娛聞，喺晒《娛果》
http://fb.com/appledailyent