勝出九西立法會補選嘅民建聯鄭泳舜以攬吓爸爸成名，身兼民主黨副主席嘅沙田區議員李永成（Wilson）唔使黨內元老教路，都好自然咁同媽媽抱抱，皆因佢喺單親家庭大，感激媽媽不辭勞苦，區選兩次敗選都起得番身，媽媽嗰種堅毅影響至深，所以就算幾忙都好，每星期都會抽時間同媽媽、婆婆飲茶食飯。
今年43歲嘅Wilson幾個月大父母就分開，對爸爸完全無印象，身為獨子嘅佢話唔孤寂，因為有幾個舅父陪佢，細個係奀皮仔通街走，「試過有次碌落山，婆婆同公公幫我手手腳腳搽晒藍藥水，突然變咗『blue blood』，哈哈。」

參加辯論更關心時事

Wilson喺橫頭磡邨住到小四搬入沙田。小學加入羽毛球、乒乓波同足球校隊，喺何明華會督銀禧中學讀書時，除上述三種球類，仲加入埋籃球隊。馬鞍山青年會學院讀預科時搞埋話劇組，攞過校際優異導演獎，沙田戲劇節更提名過最佳演員。
港大讀化學系，上莊辯論學會負責搞比賽，大三親身上陣參加辯論，打過兩大賽兼攞牌，令佢越嚟越關心時事，「訓練過程令我相信，道理同真理越辯越明」。佢話讀到大二已經覺得「我都唔係科學家」，有諗過畢業後教書或從事傳媒教育工作，指六四對佢影響好大，「當年屋企有50幾盒錄影帶，錄低六四嘅報道，嗰時開始有要捍衞民主自由嘅概念。」
98年畢業後任鄭家富議員助理，其後轉去出版社工作，2005至16年都係卿姐辦事處總幹事。2007年、2011年區選敗陣後，2015年終於喺沙田烏溪沙擊敗建制派吐氣揚眉。