一位前投行高層談及窮人難買樓時，講過「低增值人士應該離開香港」嘅金句。將市民分為「低增值」與「高增值」，無異於將人當做八達通般以增值額分級，如果以買得起樓與否分辦一個人是否「高增值人士」，大概大部份港人只能被歸類為「低增值人士」，嘟到負盡錢都唔夠俾首期。

前投行高層金句已係多年前作品，近日相繼再有知名人士叫人移民，有現任港區全國人大代表話對共產黨冇信心請離開香港，又有特首智囊兼著名物業投資者叫人移居內地、印度、墨西哥、越南等非西方國家。大概喺達官權貴眼中，香港只應由相信共產黨而且買得起樓嘅人居住，不符合此兩大條件者都不配喺居住。有人講過，政府解決問題嘅方法，就係將提出問題嘅人解決掉，所以提出香港有貧窮同住屋問題嘅人應全數以鼓勵移民方式被解決，大概亦係符合政府解決問題嘅思維，屬智將級建議。

由政府數十年前打擊小販開始，到十多年前領展接手房署管理商場並趕絕小商戶，再到而家連公公婆婆執紙皮變賣之路亦已斷絕，基層喺香港自食其力空間明顯已愈縮愈窄。與此同時，居住成本勁升，公屋又不足以應付新增人口，難怪唔少不同增值程度嘅年青人，早已透過自己方式移居心儀國家。

這邊廂大學校園因出現港獨標語而滿成風雨，相關新聞日日出現於新聞報道，那邊廂電視台以港人移居他國為主題拍咗輯節目，竟以「地球人」稱呼呢班離港長居人士，誠哥講過嗰句「此心安處是吾家」，唔知點解忽然浮現於筆者腦海。大概不論家是香港、地球、劏房定豪宅也好，能夠搵到一個容得下自己生活嘅地方，某程度上也是一種奢侈。

蘋果財經，關心你飯碗
http://fb.com/appledailyatm