大明星林黛、尤敏、葛蘭呢批身嬌玉貴嘅大美人，竟然曾經同曱甴一齊生活咗50年！而拯救佢哋嘅唔係男星陳厚、雷震，而係電影資料館嘅一班英雌！
事緣國泰機構喺五六十年代在香港設立國際電影懋業，製作過好多經典作品，包括《星星月亮太陽》、《太太萬歲》等，今年剛成立10年嘅電影資料館，開館初期已經同國泰傾，想要保存啲菲林，搞咗4年先獲對方答應送出部份。負責電影搜集嘅Valerie、Priscilla即時飛去國泰喺新加坡嘅片倉，「點知一打開啲菲林盒，一批曱甴跑出嚟，因為放得太耐」。

唔用殺蟲水免毀菲林

「小強」好多男人都驚，但幾位女將死忍頂硬上，「因為太愛電影」。佢哋話最慘係唔可以噴殺蟲水，以免損壞菲林，「如果用，修復組同事殺咗我哋」。惟有徒手拍死啲曱甴，「仲要將菲林上面嘅曱甴屍，夾到扁晒嘅『鹽蛇』搣番出嚟」。佢哋咁勇敢，終於感動國泰，將所有200幾套電影連所有海報宣傳照送晒畀電影資料館！
尤敏、林黛呢班「歷盡滄桑一美人」想重見天日，仲要資料館修復組同事「執」吓，其中Koven話舊菲林要除油迹大清洗。佢最記得幾年前有人捐咗批舊電影菲林，當中竟然有極珍貴嘅50年代中國大片、費穆導演嘅《孔夫子》，由於菲林係硝酸菲林，室溫高過40度會自燃，曾經喺美國引起戲院大火死過人，「所以要寄去意大利特別處理」。家呢套菲林要收藏喺遠離民居嘅獨立冷藏庫小心收藏。

嚴選25套即日起放映

資料館10周年都有唔少慶祝活動，包括嚴選25套舊片即日起放映，負責節目策劃嘅Sam話，最得意嘅相信係呂奇主演及監製嘅《人海奇花》，呢位後期拍咗唔少鹹鹹哋影片嘅小生，拍呢套戲講女人情與性，連配樂都有女人吟叫聲，「真係好現代o架」。《我愛紫羅蘭》都係講心理有問題嘅女性，佢話另一套李麗華嘅《誤佳期》家再睇都唔out，「係講情侶想結婚但唔夠錢擺酒、買樓，今時今日好多情侶仲有呢啲難題」。其他節目展覽詳情，可睇呢個網址： http://www.filmarchive.com
mailto:[email protected]